न्हिल्याः ११३६ चिल्लागाः २ शनिवाः
(26th March, 2016 Saturday)

वर्ल्ड नेवाः अर्गनाइजेशनया ग्वसालय् नेपाः पासा पुचः अमेरिकाय् व नेवाः अर्गनाजेशनया मंकाः ग्वसालय् अमेरिकाया बाल्टिमोरय् निक्वःगु हलिं नेवाः मुँज्या न्ह्याःगु दु । मुँज्याया न्हापांगु दिं ११३६ चिल्लागाः पारु शुक्रवाः खुन्ह् दर्ता ज्याझ्वः व म्हसिका कालबिल व बेलि ज्याझ्वः जूगु खः । निन्हुगु दिं शनिवाः धिमय् बाजं, लाखय् प्याखं सहितया र्यालि जूगु खःसा मुँज्याया उलेज्या नेवाः न्ह्यलुवाः मल्ल के सुन्दर व संयुक्त राज्य अमेरिकाया लागि नेपाःया राजदूत डा. अर्जुन कार्किं यानादीगु खः । अर्गनाइजेशनया न्वकू दया शाक्व व विनिमा रञ्जितं न्ह्याकादीगु ज्याझ्वलय् अर्गनाइजेशनया नायः डा बालगोपाल श्रेष्ठ, मू छ्याञ्जे डा नारायण राजभण्डारी, दांभरी स्वयम्भु तुलाधर, मून्वचुमि नेवाः न्ह्यलुवाः राजेन्द्र श्रेष्ठ, नेपाः च्याप्टरया नायः पुष्कर माथेमा, राप्रपा नेपालया प्रवक्ता राजाराम श्रेष्ठ लगायतया वक्तापिन्सं न्ववानादीगु खः ।

निगूगु सत्रय् थीथी विषयस थीथी वक्तापिन्सं ज्यापै न्ह्यब्वयादिलसा, ‘रिभाइभिङ नेपालभाषा’ संकिपा नं क्यनेज्या जूगु खः । बहनी नेवाः भ्वय्‌या ग्वसाः जूगु खःसा वयां लिपा थीथी सांस्कृतिक ज्याझ्वः व नेवाः फेसन शो नं जूगु खः । उगु हे ज्याझ्वलय् अर्गनाइजेशनया न्हूगु ज्यासना पुजः निर्वाचनया लिच्वः निक्वःगु हलिं नेवाः मुँज्याया झ्वलय् निर्वाचन समितिया नायः डा. महेश्वर वैद्यं थुगु लिच्वः न्यंकादीगु खः । गुगु कथं वर्ल्ड नेवाः अर्गनाइजेशनया न्हूम्ह नायलय् भाजु सिजन श्रेष्ठयात निर्विरोध ल्यःगु दु ।

न्हूगु समितिइ वरिष्ठ न्वकू दया शाक्य, न्वकू डा. नारायण राजभण्डारी, न्वकू स्वयम्भू तुलाधर, मू छ्याञ्जे सुभाषराम प्रजापति , जन सम्पर्क अधिकृत कृष्ण चखुं व दुजः राजिष श्रेष्ठ जुयादीगु दु ।

स्वदँय् छक्वः कार्यसमिति हिलीगु प्रावधान कथं अर्गनाइजेशनया न्हूगु कार्यसमितिया लागि छुं ला न्ह्यःनिसें निर्वाचन प्रक्रिया न्ह्यानाच्वंगु खःसा न्हूगु कार्यसमितिइ २७ म्ह दुजः मध्ये मुक्कं ७ म्हसिया जक मनोनयन वःगु खः । मनोनयनय् लाःपिं दक्वं हे निर्विरोध निर्वाचित जुयादीगु खः । प्वंगु पदय् लिपा मनोनयनपाखें दुजःपिं ल्ययेगु जुइ । न्हूगु कार्यसमितियात पदभार लःल्हायेगु आइतवाःया ज्याझ्वलय् जुइत्यंगु दु ।

सुभाय्

सुभाषराम प्रजापति
छ्याञ्जे व प्रवक्ता