डब्लुएनओया नेपाल सचिवालय् नीस्वन 

नेवाः न्ह्यलुवाः नरेन्द्रभक्त हाडाया संयोजक्वतय् विश्व नेवाः संगठन – हलिं नेवाः दबू (डब्लुएनओ)या नेपाः सचिवालय नीस्वंगु दु । आइतवाः यल कोपुण्डोलस्थित सातोआकि भवनय् जूगु छगू ज्याझ्वःया दथुइ हाडाया संयोजक्वतय् गुम्ह दुजः दुगु सचिवालय नीस्वंगु खः ।

उगु सचिवालयय् गणेशराम लाछि, शाक्य सुरेन, अर्थ तुलाधर, कस्तुरी श्रेष्ठ, रश्मीला प्रजापति, पुस्कर माथेमा, श्रीकृष्ण महर्जन व रत्नकाजी महर्जन दुजः कथं च्वनादीगु दु ।

अथेहे ज्याझ्वलय् डब्लुएनओयात गुगु कथं न्ह्याकेगु, नेवाः आन्दोलनलय् डब्लुएनओया भुमिका छु जुइफुइ नापं नेवाः आन्दोलनयात गुगु कथं ग्वाहालिइ यायेफइ धइगु विषयस नं सहलह जूगु खः ।

ज्याझ्वलय् डब्लुअनओया नाय डा. बालगोपाल श्रेष्ठं डब्लुअनओलय् हलिंन्यंकया झिंच्यागू देय्या नेवाःत दुजः कथं कनादिल । वय्कलं नेपालय् न्ह्यानावयाच्वंगु भाषिक आन्दोलन, राजनितिक आन्दोलन व संस्कृतिक आन्दोलनयात ग्वाहालिइ यायेगु बिचाः कथं वर्ल्ड नेवाः अर्गनाइजेसन पाखें बृहत कोष नीस्वनेगु बारे सहलह जुयाच्वंगु जानकारी नं बियादिल ।

उगु इलय् संगठनया मू संरक्षक सत्यमोहन जोशी, संरक्षक प्रा. माणिकलाल श्रेष्ठ, नेवाः स्वायत्त राज्य मंकाः संघर्ष समितिया सचिवालय कजि मल्ल के. सुन्दर, नेवाः देय् दबूया नायः नरेश ताम्रकार, डा. महेशमान श्रेष्ठ लगायतं थःथःगु बिचाः प्वंकादीगु खः ।

अथेहे ज्याझ्वलय् वर्ल्ड नेवाः अर्गनाइजेशनपाखें नेवाः देय् दबूयात थःथम्हं नेवाः भाय् सयेके सफू पिकायेगु निंतिं ७० हजार तका अथेहे रत्नकाजि मनं दयेकादीगु ‘मुद्दा’ नांगु नेपालभाषाया संकिपाया निंतिं ल्यंदनिगु ग्वहालि कथं ३० हजार तका दां लःल्हाःगु खः