सिद्धिदासया १५६ क्वःगु बुन्हि हना: ज्याझ्व: 

हलिं नेवाः दबूया ग्वसालय् ने.सं. ११४३ यंलागाः द्वितिया खुन्हु जूम प्रविधिपाखें महाकवि सिद्धिदासया कृति विषयक तःजिक खँल्हाबल्हा मुँज्या जुल । सिद्धिदासया १५६ क्वःगु वुन्हिया लसताय् जूगु थुगु ज्याझ्वः लोककवि राजभाइ जकःमिं सिद्धिदासया किपा न्ह्यःने त्वाःदेवाय् मत च्याकाः शुभारम्भ यानादीगु खः । थुगु खँल्हाबल्हा मुँज्याय् प्रा. प्रेम शन्ति तुलाधरजुं सिद्धिदासया छगू मूवंगु खण्डकाब्य सफू सत्यसती बारे दुग्यंक खँ कनादीगु खः । सत्यसती सफू सिद्धिदासया छगू मास्टरपिस खः धासे थ्व सफू थौंया परिपेक्षय् नं उलि हे महत्वं जायाच्वंगु छम्ह विधवा मिसाया बांलाःगु चरित्र न्ह्यब्वयाःतःगु कृति खः धयादिल । अथेहे मेम्ह पाहां उप प्राध्यापक जीवन कुमार महर्जनजुं सिद्धिदासया मेगु छगू ज्वःमदुगु सफू सज्जन हृदयाभरणया खण्डकाब्यया बारे नुगःया खँ प्वंकादीगु खः । वयकलं सज्जन हृदयाभरण खण्डकाब्यय् महाकविजुं थःम्हं भोगे याःगु आर्थिक अभाव, थ्वया कारणं परिवार पाखें फयेमाःगु पीडा वोध थ्व सफुतिइ मचायेक ब्वयातःगु दु धयादिल । अथे हे मेम्ह पाहां लोककवि राजभाइ जकःमिजुं महाकविया आःतक पिहांवःगु कृतिया परिचय न्ह्यब्वयादिल लिसें वय्कलं सिद्धिदास महाजुं च्वयादीगु न्यापु चिनाखँ नं न्यंकादीगु खः । ज्याझ्वःया अन्तय् हलिं नेवाः दबूया नायः संयुक्त श्रेष्ठजुं सिद्धिदासजुया कृतियात कयाः जूगु थ्व खँल्हाबल्हा अतिकं मूवंगु ज्याझ्वः जूगु खँ न्ह्यथसे सकसित सुभाय् देछाना दिल । हलिं नेवाः दबूया मूदुजः नरेश शाक्यजुं न्ह्याकादीगु थ्व ज्याझ्वलय् सिद्धिदासया बारे लोककवि व जनकविं च्वयादीगु निपु म्ये नं न्यंकेगु ज्या जूगु खः ।

ज्याझ्व:या भिडियो स्वयेत थन तियादिसं —

https://www.facebook.com/worldnewah/videos/880234907089937

anniversary bhasha mahaju mahakavi nepal nepalbhasa sajjanhrudayavaran satyasati siddhidas WNO world newah organization