चिनियाम्ह किसिचा ज्याझ्वः 

थौं न्हिल्याः ने.सं. ११४३ चिल्लागा चौथि खुन्हु झी जनकवि दुर्गालाल श्रेष्ठजुं च्वयादीगु चिनियाम्ह किसिचा मचा चिनाखँ ब्वनेज्या तःजिक क्वचाल । हलिं नेवाः दबूया केन्द्रीय न्वकू रजनी प्रधानजुया मुँज्या नायःसुइ जगतसुन्दर ब्वनेकुथिया दबुलिइ जूगु थुगु ज्याझ्वःया उलेज्या मूपाहां झी जनकवि दुर्गालाल श्रेष्ठजुं हे यानादीगु खः । जगतसुन्दर ब्वनेकुथिया विशेष ग्वहालिइ जूगु थुगु ज्याझ्वलय् ज्याझ्वः कजि लोककवि राजभाइ जकःमिजुं लसकुस यानादीगु खः । हलिं नेवाः दबूया साहित्यिक एम्वेसदर नं जुयादीम्ह जकःमिजुं लसकुस न्वचु बीगु झ्वलय् झी जनकवि दुर्गालाल श्रेष्ठ नेपाःया जनकवि जक मखु विश्वया हे गौरवमय कवि खः धयादिल । झिंखुगू थीथी ब्वनेकुथिया २४ म्ह ब्वनापिनिसं तसकं मनस्वां ह्वयेकाः ब्वति काःगु थुगु ऐतिहासिक ज्याझ्वलय् हलिं नेवाः दबू नेपाः कवःया नायः भाजु सुरेन्द्र भक्त श्रेष्ठजुं पाहांया थासं न्वचु बीगु झ्वलय् वय्कलं झी जनकवि दुर्गालाल श्रेष्ठया चिनियाम्ह किसिचा ज्याझ्वः न्ह्याके खंगुलिं ग्वसाःखलः तसकं तसताःगु खँ कँसे आः वैगु खुक्वःगु हलिं नेवाः न्हि खुन्हु जनकविजुयात तःजिक सम्मान यायेगु ज्याझ्व दुगु खँ कनादिल ।

थुगु ज्याझ्वलय् सफू प्रकासन संस्थाया दुज सुभानी सिंहजुं आः वइगु चैत्र ४ खुन्हु जनकविजुया चिनियाम्ह किसियाया अंग्रेजी अनुवाद सफू पिथने त्यनागु जानकारी बियादिल । थःगु नुगः खँ तयेगु झ्वलय् जगतसुन्दर ब्वनेकुथिया प्रिन्सिपल व थ्व ज्याझ्वःया दुजः मय्जु सुनिता मानन्धरजुं थौं थ्व ज्याझ्वः न्यनाः झी जनकवि दुर्गालाल श्रेष्ठजु अतिकं लयतायादीगुलिं थ्व ज्याझ्वः न्ह्याकागुया तातुना पुवंगु दु धकाः धयादिल । हलिं नेवाः दबूया सल्लाहकारपिं, हलिं नेवाः दबूया निवर्तमान नेपाः कवःया नायः शाक्य सुरेन, वर्तमान सचिव लुमु श्रेष्ठ, हलिं नेवाः दबू जर्मनया प्रतिनिधिपिं पाहांकथं उपस्थित जुयादीगु थुगु ज्याझ्वलय् चिनियाम्ह किसिचा दुनेया चिनाखँया छ्योंत रञ्जना लिपि आखलं दबुलिइ हे च्वयेगु अर्थात क्यारिकेचर यायेगु ज्या जूगु खः । मय्जु लुमु श्रेष्ठया नेतृत्वय् जूगु थुगु क्यारिकेचरं ज्याझ्वलं थौंया चिनाखँ व्वनेज्याझ्वः सफल यायेत तःजिगु हःपाः जूवंगु दु ।

नीप्यम्ह ब्वनामिपिनिसं तसकं हे मनस्वां ह्वय्काः दर्शनतय्गु नुगः साले फयेक चिनाखँ ब्वना न्यंकादीगु खः । थुगु ज्याझ्वलय् जूम प्रविधि छ्यलाः प्रोजेक्टर पाखें हलिं नेवाः दबूया केन्द्रीय नायः संयुक्त श्रेष्ठजुं ग्वसाःखलःपाखें मू न्वचू न्ह्यब्वयादिसे थ्व ज्याझ्वः ताःलाकेत ग्वहालि यानादीपिं सकसितं सुभाय् देछानादिल नापं वय्कलं थौं न्ह्यब्वःगु सुथ जुइ धाःगु कविता तसकं च्वन्ह्याःगु व थःत यःगु बांलाःगु चिनाखँ खः धयादिल । थुगु ज्याझ्वःया अन्तय् झी जनकबि दुर्गालाल श्रेष्ठजुं नेपाःया संसारय् थौंया ज्याभवः झीगु नेवाः ख्यलय् गबलें मजूनिकथंया ऐतिहासिक ज्याझ्वः जू वंगु दु धयादिल । वय्कलं सकल कविपिनिसं मचा चिनाखँ च्वयादीत इनाप यासे हलिं नेवाः दबूया थ्व ज्याझ्वः तसकं झःझः धाःगु पल्पसाया जः खः धयादिल । नापं वय्कलं थः मदये धुंकाःया चिं धैम्ह हे लोककवि राजभाइ जकःमि खः धकाः धयादिल । लिसें वय्कलं राजभाइ जकःमिजुं थ्व जिं बियागु अविभारा कुबिया दी धकाः विश्वास नं प्वंकादिल । थौंया ज्याझ्वः नांजाःम्ह म्ये हालामि पवित्र कसाजुं तसकं न्ह्याइपुक न्ह्याकादीगु खः ।